Jauh dan Murah
+ ”Ungkus naik ujek kita ini parlu diatur,”ujar Gabus wayah bubuhannya jadi tukang ujek.
- “kanapa musti diatur Bus?” ujar Tulamak.
+ ”Banyak partimbangannya Mak ai. Partama supaya seragam, kadua supaya kada rugi dan katiga supaya jangan basaing,” ujar Tulamak.
- “Sual larang atawa murahnya ungkus naik ujek ini baiknya tatap haja kaya wayah ini yaitu tagantung kaikhlasan nang mambari,” ujarnya.
+”kalu tagantung nang mambari balum cucuk wan jauh paraknya,”sahut Garbus.
-“Supaya diakali, dipanderi panumpangnya, diambung ambungi supaya hatinya sanang pasti mambari lembaran lima ribuan kada cagar ba-angsulan lagi,” ujar Tulamak.
+ “Aku mausulakan ini karna malihat gawian Palui nang saka handak hatinya maandak ungkus. Apalagi bila nang manumpang itu babinian atawa mahasiswi. Itu nah paluinya datang, takuni Mak napa alasannya,” ujar Garbus manyuruh
- “ Bujurkah Lui ungkus naik ujek ikam saka handak hati haja ?” ujar Tulamak manakuni.
= “ Hi ih bujuran Maik ai. Bila ka pasar jalanya mulus dan taparak maka ungkusnya Rp.4.000 tapi bila jalannya bakuliling jalannya sakit sadikit maka ungkusnya Rp.2.000 haja,” ujar Palui mangakui.
+ “Tarip ikam itu lucu Lui ai, kada masuk akal. Mustinya justru jalanan nang sakit dan jauh itulah nang ungkusnya larang Rp.4.000 sedangkan jalanan mulus dan parak mustinya murah Rp.2.000 haja “ ujar Garbus prutes, makanya inya mausulakan supaya ada keserangaman ungkus.
= “ Tarip murah di jalan sakit itu khusus gasan babinian dan mahasiswi haja karna maksudku handak mahargai jender dan mengabdi kaum ibu sebagai tanda tarima kasih,” ujar Palui lihum.
- “ Bapadah ja bujuran napa alasan ikam lui ?” ujar Tulamak kada parcaya
= “ Sabujurnya kaya ini nah alasannya Mak ai. Dijalanan sakit baluang luang itu pasti jalanannya bagamat dan aku tarancaki mangacak rem dan itulah nang ku nikmati…., itulah mambuatku bahagia. Makin rancak aku mangacak rem pasti sarancak itu jua dada montok panumpangku itu batikap ka balukukku, aduhai bahagianya,” ujar palui mangalakak tatawa mambuka rahasianya.
Palui Balamak
+ “Aku kada hiran kalu si Tulamak itu lamak awaknya,”ujar Garbus
= “Napa sebabnya Bus ?” ujar Palui
+ “Si Tulamak di ngarani Tulamak karna katurunan urang lamak,abah umanya lamak,” ujar Garbus.
- “ Kalu si Tuhirang itu napa sababnya ? “ ujar Tulamak umpat batakun
+ “ si Tuhirang di ngarani Tuhirang karna awaknya hirang,” ujar Garbus
- “ Tapi nyatanya,abahnya putih dan umanya malah putih kuning,”ujar tulamak mambahas karna kada sama wan inya nang ba asal katurunan lamak.
= “ Ku kira si tuhirang itu karna kasalahan teknis wayah umanya mangidam, ku dangar sidin katuju babaju hirang, batapih hirang, nginum kupi dan katuju makan rawon makanya hasilnya hirang ,” ujar Palui lihum.
-“ hi ih lah, si tuhirang itu diranakakan wayah bulan kadap dan ada pemadaman listrik,” ujar Tulamak manambahi.
+ “ampun maaf lui – lah nang anih justru Palui, “ ujar Garbus
- “ Napanya yang anih Bus?” ujar Tulamak
+ “ Kawal kita si Palui ini wayah lagi bujangan kurus karing awaknya karna abah umanya memang ba – awak kurus. Tapi wayah ini imbah dua talu bulan babini malah awaknya makin balamak,”ujar Garbus.
-“ Napa ilmunya dan napa jamunya Lui ?” ujar Tulamak.
= “Aku hiran jua Mak ai, padahal makan minumku tatap haja, malah jarang duduk di warung acil dan sama sekali kadada makanan tambahan, tapi nyatanya awakku balamak,” ujar Palui
+ “Mungkin imbah kawin ini hati ikam tenang banar karna kawa manyandang si Zuleha nang jadi rebutan urang sekampung,” ujar Garbus.
= “He he hee…., ku kira kada karna itu Bus ai ,”sahut Palui.
- “ Lalu karna napa ? “ ujar Tulamak.
=”Mungkin karna hatiku sanag saban malam manikmati dua balik susu ganal dan di tambah dua paha mulus,”ujar Palui sambil mangalakak tatawa kahimungan
Kanderaan Nang Dihurmati
-“Jalanan di wadah kita ini makin hari makin bakipit,”ujar Tulamak mamanderi Palui.
=” Napa buktinya Mak?”sahut Palui.
- “ Buktinya saban hari jalanan macet tarus,” ujar Tulamak.
= “ Kalu manurut paraturan lalu lintas bahwa jalanan itu dipadahkan macet kalu sampai tatahan batangah jam, “ ujar Palui.
+” Kalu sampai bajam – jam tatahan ngarannya kada macet Lui ai tapi jalanan wan muturnya muguk,” ujar Garbus umpat manyahut.
-“ Kalu kaya itu ganti haja peraturannya karna jelas jelas manyiksa rakyat pamakai jalanan Mak ai,” ujar Palui.
=”sabujurnya jalanan macet atawa tatahan – tahan atawa muguk itu kada salah jalanan Mak ai,” ujar Palui
+”Lalu siapa nang di salah kan Lui?”ujar Garbus
=” Nang patut di salahkan adalah makin banyaknya kanderaan, mutur ban dua, mutur ban ampat, mutur trak, bica samunyaan itu kada mamatuhi paraturan lalu lintas. Kada Cuma kada mamatuhi malah malanggar lampu lalu lintas wadah panyaberangan rampak tarus.
- “Banyaknya kanderaan di wadah kita jangan di salahkan karna itu tandanya rakyat makmur,”ujar Tulamak.
= “Biarpun jalanan sibuk, rami, macet tapi nyatanya ada mutur nang kawa bajalan tarus kada bulih di halangi,”ujar Palui.
- “ Itu pasti rumbungan pajabat atawa urang penting nang di kawal pulisi,” sahut Tulamak.
= “ Bujur haja jawaban ikam itu Mak ai karna kita manghurmati urang penting. Tapi ada lagi lain pajabat dan lain rumbungan tatap di hurmati,di bari jalan dan di dahulukan kanderaannya,”ujar Palui
+ “Ada yaitu mutur padam kabakaran,” ujar Garbus.
= “ada lagi Bus ai, bahkan kanderaan lain maminggir dan bagamat jalannya bila batamuan mutur inui ,” ujar Palui.
- “ Kadada lagi Lui ai, “ ujar Tulamak.
= “ ada Mai ai yaitu kanderaan ban ampat , warnanya putih dan bandira hijau demi mahurmati urang nang babuat di dalamnya,” ujar Palui pina sadih
+ “ OoooooH ….., bujur Lui ai , kandaraan itu batulisan ambulans atawa tulisan mutur janazah,”ujar Tulamak paham maksud Palui.
